நின்ற சொல்லர் நீடுதோன்று இனியர் - நற்றிணை - பாடல் - விளக்கம்

 

நின்ற சொல்லர்  நீடுதோன்று இனியர் - நற்றிணை - பாடல் - விளக்கம்

புலவர் : கபிலர்

திணை : குறிஞ்சி

துறை  : பிரிவு உணர்த்திய தோழிக்குத் தலைவி சொல்லியது

கூற்று விளக்கம் – பொருள் ஈட்டுதற் கரணமாகத் தலைவன் தலைவியை 

விட்டுப் பிரிய எண்ணியதைத் தோழி அறிந்து, தலைவியிடம் கூற, தலைவி 

“தலைவன் அங்ஙனம் என்னை விட்டுப் பிரிய மாட்டார்” எனத் 

தலைவனைப் புகழ்ந்து கூறுகின்றாள்.

பாடல்

நின்ற சொல்லர்; நீடுதோன்று இனியர்;

என்றும் என் தோள் பிரிபு அறியலரே'

தாமரைத் தண் தாது ஊதி, மீமிசைச்

சாந்தில் தொடுத்த தீம் தேன் போல,

புரைய மன்ற, புரையோர் கேண்மை;

நீர் இன்று அமையா உலகம் போலத்

தம் இன்று அமையா நம் நயந்தருளி,

நறு நுதல் பசத்தல் அஞ்சிச்

சிறுமை உறுபவோ? செய்பு அறியலரே!

பொருள் :

தோழீ ! நம் காதலர் சொன்ன சொல்லில் இருந்து  தவறாத வாய்மையை 

உடையவர்.

நெடிதாகத் தோன்றுகின்ற இனிமையை உடையவர்.

எப்பொழுதும் என் தோள்களைப் பிரியக் கூடிய குணத்தை கொண்டவர் 

இல்லை .

அத்தகைய உயர்ந்தவரான தலைவனின்  நட்பானது தாமரையின் குளிர்ந்த 

தேனினையும் உயர்ந்த  சந்தனத்தின் தேனினையும் குடித்த தேனியானது , 

அந்தச் சந்தன மரத்தில் கட்டி வைத்த இனிய தேன் போலத் திண்ணமானது.

நீர் இன்றி அமையாத இந்த உலகத்தைப் போல நான் அவரின்றி இருக்க 

இயலாது என்பதை அறிந்தவர் .

மேலும் அவரைப் பிரிதலால் என் நெற்றியில் ஏற்படும் பசலை நோய்க்கு 

அஞ்சியும்  என்னை விட்டுப்  பிரிந்து செல்ல எண்ண மாட்டார்  

என்கிறாள்  தலைவி .