நற்றிணை 01 நின்ற சொல்லர்; நீடுதோறு இனியர்;

 

நற்றிணை 01 நின்ற சொல்லர்; நீடுதோறு இனியர்; பாடியவர் : கபிலர் திணை   : குறிஞ்சி கூற்று    : பிரிவு உணர்த்திய தோழிக்குத் தலைவி சொல்லியது .   நின்ற சொல்லர்; நீடுதோறு இனியர்; என்றும் என் தோள் பிரிபு அறியலரே' தாமரைத் தண் தாது ஊதி, மீமிசைச் சாந்தில் தொடுத்த தீம் தேன் போல, புரைய மன்ற, புரையோர் கேண்மை;	5
நீர் இன்று அமையா உலகம் போலத் தம் இன்று அமையா நம் நயந்தருளி, நறு நுதல் பசத்தல் அஞ்சிச் சிறுமை உறுபவோ? செய்பு அறியலரே!

தோழீ ! நம் காதலர் நிலைமை தவறாத வாய்மையுடையவர்; நெடிதாகத்

தோன்றுகின்ற இனிமையுடையவர்; எப்பொழுதும் என் தோள்களைப் பிரிதல்

என்பதை அறியாதவர் . அத்தகைய சிறந்தவருடைய நட்பு,  தாமரையின்

குளிர்ந்த மகரந்ததினை ஊதி , உயர்ந்த சந்தனத்தின் தாதினையும் ஊதி,

அந்தச் சந்தன மரத்திதின் உச்சியில் சென்று  வைத்த இனிய தேன் போல

உறுதியாக உயர்ந்தது. தண்ணீர் இல்லாமல் இவ்வுலகம் அமையாது. அது

போல அவர் இல்லாமல் நாம் இல்லை . நம் மீது மிகுந்த விருப்பம்

கொண்டவர் அவர் . அவர் பிரிந்தால் நம்  நெற்றியில்  பசலை படரும் .

அவ்வாறு பசலை படர்வதற்கு  அஞ்சி  தடுமாற்றம் அடைவாரோ ?

அடையமாட்டார் . (இனியும்  அவர் பிரியா கருத மாட்டார் என்பது முடிபு )

கூற்று விளக்கம் : தலைவன் பிரியக்  கருதியது  அறிந்த தோழி  தலைவி 

இடத்துக் கூறுதலும் , தலைவி அவர் இல்லாமல்  அமையாத என்னை

வருந்தும் படி விட்டுபிரிக்கின்ற  அன்னதொரு   குணக்குறைபாடு

இல்லாதவர் எனத் தலைவனை புகழ்ந்து கூறுவது .